سٹی ایکسپریس نیوز
سری نگر، 07 جولائی،2026: بارہمولہ کی ڈسٹرکٹ ڈیولپمنٹ کونسل کی سابق چیئرپرسن اور پی ڈی پی کے شریک بانی مظفر حسین بیگ کی اہلیہ، سفینہ بیگ نے بدھ کے روز یہاں پارٹی ہیڈکوارٹر میں نیشنل کانفرنس میں شمولیت اختیار کی۔
سفینہ بیگ جو اپنے حامیوں کے ہمراہ تھیں نے نیشنل کانفرنس کے صدر ڈاکٹر فاروق عبداللہ، وزیر اعلیٰ عمر عبداللہ، دیہی ترقی کے وزیر جاوید احمد ڈار، اور پارٹی کے سینئر رہنماؤں علی محمد ساگر، چودھری محمد رمضان اور دیگر کی موجودگی میں پارٹی میں شمولیت اختیار کی۔
سفینہ بیگ کی شمولیت کو بارہمولہ ضلع میں نیشنل کانفرنس کے لیے ایک بڑی تقویت کے طور پر دیکھا جا رہا ہے، جہاں پارٹی نے 2024 کے انتخابات میں اسمبلی کی 7 میں سے 6 نشستیں جیتی تھیں۔
سفینہ بیگ کے شوہر، مظفر حسین بیگ، جو پی ڈی پی کے بانیوں میں شامل تھے، نے پی ڈی پی-کانگریس اتحاد کے دور میں جب غلام نبی آزاد اس اتحاد کی قیادت کر رہے تھے نائب وزیراعلیٰ کے طور پر خدمات انجام دی تھیں۔
مظفر بیگ نے بارہمولہ سے 2002 اور 2008 کے اسمبلی انتخابات میں کامیابی حاصل کی تھی اور ساتھ ہی بارہمولہ پارلیمانی نشست سے 2014 کا لوک سبھا الیکشن بھی جیتا تھا۔
About the Author
