سٹی ایکسپریس نیوز
گاندربل، 24 ستمبر،2025 : بدھ کے روز گاندربل ضلع کے کنگن علاقے میں اس وقت کشیدگی پھیل گئی جب سینکڑوں مقامی لوگوں بشمول خواتین کی ایک بڑی تعداد نے نوجوان اعجاز احمد کے اس کے دو دوستوں کے ہاتھوں مبینہ قتل کے خلاف احتجاج کیا۔
نعرے بلند کرتے ہوئے اور غم کا اظہار کرتے ہوئے، مظاہرین نے سڑکوں پر مارچ کرتے ہوئے اس کیس کی بروقت اور منصفانہ تحقیقات کا مطالبہ کیا۔ احتجاجی مظاہرے کی قیادت زیادہ تر خواتین کر رہی تھی، جنہوں نے 22 سالہ نوجوان کی ہلاکت پر ماتم کرتے ہوئے مین روڈ کو کچھ دیر کے لیے بلاک کر دیا۔
مظاہرین نے ملزمان کو سخت سزا دینے کا مطالبہ کیا، جن کی شناخت نیاز الحق اور معین کے نام سے ہوئی، دونوں کو پولیس پہلے ہی گرفتار کر چکی ہے۔ احتجاج کرنے والی خواتین کے ایک گروپ نے نیوز ایجنسی کو بتایا، ’’ہم اعجاز احمد کے لیے انصاف چاہتے ہیں اور ایک شفاف تحقیقات چاہتے ہیں جو سچائی کو لوگوں کے سامنے لائے‘‘۔
سینئر سپرنٹنڈنٹ آف پولیس (ایس ایس پی) گاندربل، محمد خلیل پوسوال نے یقین دلایا کہ معاملے کی جانچ منصفانہ اور وقت کے ساتھ کی جائے گی۔ “انصاف کی فراہمی کو یقینی بنانے کے لیے سائنسی اور فرانزک طریقے استعمال کیے جائیں گے۔ اس عمل میں کوئی تاخیر نہیں ہوگی،” انہوں نے یقین دلایا۔
نظم و نسق برقرار رکھنے کے لیے پورے کنگن میں سیکورٹی فورسز کو بڑی تعداد میں تعینات کیا گیا تھا۔ پولیس حکام کا کہنا ہے کہ حالات قابو میں ہیں اور مظاہرین کو منانے کی کوششیں کی جا رہی ہیں۔
سلطان کالونی کنگن کے رہائشی اعجاز احمد کو ساتھیوں نے مبینہ طور پر تار سے گلا دبا کر ہلاک کر دیا جس سے علاقے میں شدید غم و غصہ پھیل گیا۔ (کے این ٹی)
About the Author
