طویل خشک موسمی صورتحال درجہ حرارت میں اضافے کی وجہ
6سے8 جولائی کے درمیان صبح کے وقت بارش متوقع لیکن موسلادھار بارش کی کوئی پیش گوئی نہیں
نیوزسروس
سری نگر:۵،جولائی:وادی کشمیر میں اس سال موسم کی خرابی دیکھنے میں آ رہی ہے کیونکہ سردی کی ایک طویل مدت کے بعد درجہ حرارت میں اچانک اضافہ ہو رہا ہے، جس سے سیاحوں اور مقامی باشندوں کو یکساں پریشانی ہو رہی ہے۔ماہر موسمیات نے بڑھتے ہوئے درجہ حرارت کی وجہ وادی میں طویل خشکی کو قرار دیا ہے۔ سری نگرمیں قائم ہندستانی محکمہ موسمیات کے علاقائی مرکز کے ڈائریکٹر سونم لوٹس نے کہاہے کہ ہم نے خشک موسم کا مشاہدہ کیا ہے جس کے نتیجے میں درجہ حرارت میں اضافہ ہوا ہے۔ انہوںنے کہاکہ جولائی کے مہینے میں کشمیر وادی میں درجہ حرارت 30 سے 31 ڈگری سینٹی گریڈ اور جموں میں35 ڈگری سینٹی گریڈ رہنے کا امکان ہے۔انہوںنے کہاکہ جموں خطے میں یہاں موسم گرما ہے اور موسم غیر معمولی نہیں ہے۔ماہر موسمیات سونم لوٹس نے کہا کہ درجہ حرارت بہت زیادہ ہے لیکن گرمی کی لہر کے حالات نہیں ہیں۔ڈائریکٹر محکمہ موسمیات نے کہاکہ آج یعنی5 جولائی کو ہلکی بارش کا امکان ہے جبکہ6سے8 جولائی کے درمیان صبح کے وقت بارش متوقع ہے۔ لیکن ابھی تک موسلادھار بارش کی کوئی پیش گوئی نہیں ہے۔سونم لوٹس نے کہاکہ درجہ حرارت میں اتار چڑھاو¿ آئے گا لیکن اعلی درجہ حرارت برقرار نہیں رہے گا۔ انہوں نے مزید کہاکہ اس سال جون کے مہینے میں سب سے زیادہ درجہ حرارت35 ڈگری سینٹی گریڈ ریکارڈ کیا گیا۔سونم لوٹس نے کہا کہ درجہ حرارت کافی زیادہ ہونے کی وجہ سے بھاری بارش کی صورت میں جموں و کشمیر کے کچھ حصوں میں مقامی سطح پر سیلاب آنے کا امکان ہے۔تاہم انہوں نے مئی کے مہینے میں غیر موسمی بارشوں کی وجہ سے وادی میں زیر زمین پانی کی سطح بلند ہونے کے پیش نظر بڑے سیلاب کے امکان کو مسترد کردیا۔سونم لوٹس کاکہناہے کہ درجہ حرارت بہت زیادہ اوپرچلا گیا ہے اور گرم درجہ حرارت کی وجہ سے بخارات میں تیزی آئی ہے۔ مانسون5 سے 7 جولائی کے درمیان فعال ہونے کا امکان ہے اور پانی کے تناو¿ کو بہتر بنانے میں مدد کرے گا۔ماہرموسمیات کاکہناتھاکہ فی الوقت وادی کشمیر میں زیادہ تر مقامات پر زیادہ سے زیادہ درجہ حرارت اوسطاً30 ڈگری سینٹی گریڈ ہے، اونچائی کا اثر اسے حقیقت سے چند ڈگری زیادہ محسوس کرتا ہے۔اس دوران سیاحوں نے کشمیرمیں اتنی زیادہ گرمی ہونے پر حیرت ظاہر کی ۔اتر پردیش کے ایک سیاح سنیل کمار نے کہاکہ کشمیروادی میں موسم بہت گرم ہے۔ ہم موسم گرما کی تعطیلات پر اتر پردیش سے یہاں آئے ہیں کیونکہ ہمیں موسم کے خوشگوار ہونے کا اندازہ تھا۔ کل میں بھی گلمرگ گیا تھا لیکن وہاں کا درجہ حرارت بھی بہت زیادہ تھا۔ فردوس الہیٰ نامی ایک مقامی شہری نے بتایا کہ وادی میں درجہ حرارت پہلی بار 35 ڈگری سینٹی گریڈ سے تجاوز کر گیا ہے۔کشمیر میں درجہ حرارت عام طور پر معتدل رہتا ہے اور 34 ڈگری سینٹی گریڈ کے فوراً بعد بارش ہوتی ہے۔ ماہرین کا کہنا ہے کہ اس کی وجہ گلوبل وارمنگ، گلیشیئرز کے پگھلنے کے اثرات ہیں جو آبی ذخائر میں بھی پانی کی سطح میں اضافے کا باعث بنتے ہیں۔ایک مقامی یونیورسٹی میں زیر تعلیم جنوبی افریقی شہری نے کہاکہ عام طور پر یہاں کے لوگ کشمیر میں اس قسم کے موسم سے زیادہ آرام دہ نہیں ہوتے۔ لوگ ٹھنڈی جگہ پر رہنے کو ترجیح دیتے ہیں جہاں بہت سارے درخت ہوں اور جب وہ سڑکوں پر ہوں تو سایہ دار ہوں۔ درختوں والے پارکوں میں درجہ حرارت بہت بہتر ہے۔انہوںنے کہاکہ میں 2021 سے کشمیر میں رہ رہا ہوں اور مجھے لگتا ہے کہ درجہ حرارت کافی گرم ہے اور روز بروز بڑھتا جا رہا ہے۔ انہوں نے مزید کہا کہ لوگوں کو بہت سی مشکلات کا سامنا ہے کیونکہ وہ اس قسم کے موسم کے عادی نہیں ہیں۔
