جنوب مغربی مانسون(جون تاستمبر2024):بارش کا منظر نامہ !
معمول کی 550.4ملی میٹر کے مقابلے میں صرف363.1ملی میٹر بارش ،187.3ملی میٹر کم
نیوزسروس
سری نگر:۲ ،اکتوبر: جموں وکشمیرمیں ماحولیاتی تبدیلی کے اثرات یہاںکے موسم پر اب نمایاں ہورہے ہیں ،کیونکہ جہاں موسم سرما میں کشمیر وادی ،خطہ پیرپنچال اور وادی چناب میں اب ماضی کے بالکل برعکس کم برف باری ہوتی ہے ،اور ماہ دسمبر کے اوائل سے ہی سخت سردیوں کا سلسلہ شروع ہوجاتا ہے ،وہیں اب موسم گرما کے کم سے کم تین مہینوں کے دوران کشمیر وادی میں دن اور رات کا درجہ حرارت اسقدر بڑھ جاتاہے کہ اس خطہ ارض کو اب لوگ سردپتھری نہیں کہتے ہیں ۔گزشتہ موسم سرمامیں معمول سے کم برف باری ہونے کے بعد اب ماہ جون سے ماہ ستمبرتک جنوب مغربی مانسون کے دوران جموں وکشمیر بالخصوص وادی میں اتنی کم مقدار میں بارش ہوئی کہ دریائے جہلم سے لیکر ندی نالوں اور دیگر آبی ذخائرمیں بھی پانی کی سطح کا فی نیچے آگئی ۔اب موسمیاتی مرکز سری نگر کی جانب سے منگل کی شام رواں سال ماہ جون کے اوائل سے ماہ ستمبرکے آخرتک مونسون کے سیزن میں ہونے والی بارش کے حوالے سے جواعداد وشمار جاری کئے گئے ہیں ،وہ نہ صرف چونکا دینے والے ہیں ،بلکہ جموں وکشمیرمیں موسم کے خطرناک انداز میں رویہ اور رُخ بدلنے کا واضح اشارہ دیتے ہیں ۔ موسمیاتی مرکز سری نگرکے مطابق ماہ جون سے ماہ ستمبرکے آخرتک جنوب مغربی مانسون کے دوران جہاں جموں وکشمیرمیں معمول کے مطابق 550.4 ملی میٹر بارش ہونی چاہئے تھی ،وہیں اس دوران 20اضلاع کے علاوہ یونین ٹریٹری لداخ کے لیہہ اورکارگل اضلاع کو ملاکر کل 363.1ملی میٹر بارش ریکارڈکی گئی ،یعنی مجموعی طور پر187.3ملی میٹر یعنی34 فیصد کم بار ش ہوئی ۔موسمیاتی مرکز کے مطابق جموں و کشمیراورلداخ میں جنوبی مغربی مانسون (جون تا ستمبر2024)کے دوران ہونے والی بارش کا منظر نا مہ کچھ ایسا رہاکہ جموں وکشمیر میں مانسون سیزن کی بارشیں جون سے ستمبر کے دوران 34فیصدکی کمی کےساتھ طویل مدتی اوسط کا 66فیصد رہی۔موسمیاتی مرکز کے مطابق اگست 2024میں 13فیصد کم بارش ہوئی جبکہ جون، جولائی اور ستمبر میں بالترتیب بارش کا خسارہ،49فیصد،42فیصد اور48فیصد درج کیا گیا۔ موسمیاتی مرکز سری نگرکے مرتب کردہ اعدادوشمارمیں مزید جانکاری دی گئی ہے کہ جموں و کشمیر اور لداخ کے22 اضلاع میں سے 8 اضلاع میں ماہ جون سے ماہ ستمبرتکمعمول کی بارش ہوئی،تاہم10 اضلاع میں بارشوں کی کمی ریکارڈکی گئی اور 4 اضلاع میں بارشوں کی بڑی کمی رہی۔
