اونتی پورہ، 26 اکتوبر،2026: اونتی پورہ پولیس نے باتھین، پتل باغ اور گلندر میں مبینہ غیر قانونی کان کنی کے خلاف کارروائی کرتے ہوئے پانچ بھاری ایل اینڈ ٹی مشینیں اور چار ڈمپر ضبط کر لیے ہیں، اور اس سلسلے میں تین ایف آئی آر درج کی گئی ہیں۔ پولیس کے مطابق، تھانہ کھریو کے تحت آنے والے علاقے باتھین سے پانچ بھاری ایل اینڈ ٹی مشینیں ضبط کی گئیں، جبکہ تھانہ پامپور کی حدود میں آنے والے علاقوں پتل باغ اور گلندر سے چار ڈمپر قبضے میں لیے گئے۔ تھانہ کھریو میں ایف آئی آر نمبر 84/2026 درج کی گئی ہے، جبکہ تھانہ پامپور میں قانون کی متعلقہ دفعات کے تحت ایف آئی آر نمبر 93/2026 اور 94/2026 درج کی گئی ہیں۔ ان مقدمات کی تفتیش جاری ہے۔ پولیس نے اس کارروائی کو علاقے میں معدنیات کی غیر قانونی کان کنی اور نقل و حمل کے خلاف ایک بڑی کارروائی قرار دیا ہے۔ پولیس کا دعویٰ ہے کہ مقامی سطح پر اس نوعیت کی یہ پہلی کارروائی ہے جس میں اتنی بھاری مشینری اور ڈمپر ضبط کیے گئے ہیں۔
