سٹی ایکسپریس نیوز
سری نگر، 15 جنوری،2026: جموں و کشمیر کی حکومت نے یوم جمہوریہ 2026 کی تقریبات کے انتظامات کو حتمی شکل دے دی ہے، جس میں لیفٹیننٹ گورنر منوج سنہا ایم اے اسٹیڈیم، جموں میں منعقد ہونے والے مرکزی تقریب کی صدارت کریں گے اور سلامی لیں گے، جب کہ وزیر اعلیٰ عمر عبداللہ اس تقریب میں بطور مہمان خصوصی شرکت کریں گے۔
خبر رساں ایجنسی کے مطابق جنرل ایڈمنسٹریشن ڈیپارٹمنٹ (جی اے ڈی) کی طرف سے ڈویژنل کمشنر جموں و کشمیر کو جاری کردہ ایک سرکاری مواصلت کے مطابق، مختلف وزراء اور معززین کو 26 جنوری 2026 کو مرکز کے زیر انتظام علاقے کے مختلف ضلعی ہیڈکوارٹرز میں یوم جمہوریہ کی تقریبات کی صدارت کرنے اور سلامی لینے کا کام سونپا گیا ہے۔
شیڈول کے مطابق نائب وزیر اعلی سریندر چودھری سری نگر میں یوم جمہوریہ کی تقریب کی صدارت کریں گے جبکہ اننت ناگ میں وزیر صحت اور تعلیم سکینہ مسعود ایتو سلامی لیں گی۔ وزیر جاوید احمد رانا کو پونچھ سونپا گیا ہے، وزیر جاوید احمد ڈار بارہمولہ میں تقریب کی صدارت کریں گے، اور وزیر ستیش شرما کٹھوعہ میں سلامی لیں گے۔
حکم نامے میں مزید کہا گیا ہے کہ ضلع ہیڈکوارٹرس پر جو مذکورہ وزراء کے احاطہ میں نہیں ہیں، ڈی ڈی سی چیرپرسن یوم جمہوریہ کی تقاریب کی صدارت کریں گے۔ سب ڈویژنل ہیڈ کوارٹرز میں، سب ڈویژنل مجسٹریٹس کو ذمہ داری تفویض کی گئی ہے، جبکہ تحصیل، بلاک اور میونسپل ہیڈ کوارٹرز میں، متعلقہ ڈپٹی کمشنرز کی طرف سے طے شدہ، تحصیلدار یا اعلیٰ ترین سول افسر کی طرف سے سلامی لی جائے گی۔
حکومت نے تمام متعلقہ حکام کو ہدایت کی ہے کہ وہ قومی تقریب کو منانے کے لیے جموں و کشمیر بھر میں ہموار، باوقار اور اچھی طرح سے مربوط تقریبات کو یقینی بنائیں۔(کے این سی)
About the Author
