رام بن میں ہفتے کی صبح قومی شاہراہ پر2سڑک حادثات
مغربی بنگال کی خاتون ہلاک، 9سیکورٹی اہلکاروں سمیت 56افراد زخمی
5شدیدزخمی گورنمنٹ میڈیکل کالج و ہسپتال جموں منتقل ،باقی زخمیوں کی حالت مستحکم:حکام
نیوزایجنسی
سری نگر:۳ ،اکتوبر:جموں و کشمیر کے ضلع رام بن میں ہفتے کی صبح قومی شاہراہ44 پر ماروگ اور کیلا موڑ کے قریب پیش آئے2 الگ الگ سڑک حادثات میں ایک خاتون ہلاک جبکہ 9سیکورٹی اہلکاروں سمیت 56افراد زخمی ہو گئے۔جے کے این ایس کے مطابق پولیس نے بتایاکہ پہلا حادثہ ہفتے کی صبح تقریباً 8بجکر 50منٹ پر ماروگ کے قریب اس وقت پیش آیا جب مغربی بنگال سے جموں کی جانب جا رہی مسافر بس، نمبرWB37D-8989، ڈرائیور کے قابو سے باہر ہو کر سڑک سے پھسل گئی اور پہاڑی سے جا ٹکرائی۔ حادثے کے وقت بس میں تقریباً 57 مسافر سوار تھے۔حادثے کے فوراً بعد پولیس، مقامی رضاکاروں اور ریسکیو ٹیموں نے موقع پر پہنچ کر امدادی کارروائی شروع کی(اقی ۵پر)
اور زخمی مسافروں کو بس سے نکال کر ایمبولینسوں کے ذریعے ضلع اسپتال رام بن منتقل کیا گیا، جہاں انہیں طبی امداد فراہم کی گئی۔ پولیس کے مطابق زخمی مسافروں کی مدد اور انہیں اسپتال منتقل کرنے کےلئے ضلع پولیس لائنز رام بن سے ایک کیو آر ٹی گاڑی، نمبر JK02CR-1506، روانہ کی گئی تھی۔ تاہم، تقریباً 9بجکر15منٹ پر کیلا موڑ کے قریب یہ گاڑی بھی سڑک حادثے کا شکار ہو کر الٹ گئی۔اس حادثے میں9 افراد زخمی ہوئے، جن میں سی آر پی ایف کی 187ویں بٹالین کے 3 اہلکار اور جموں و کشمیر پولیس کے5 اہلکار شامل ہیں، جبکہ ایک دیگر شخص کے زخمی ہونے کی بھی اطلاع ہے۔ تمام زخمیوں کو فوری طور پر ضلع اسپتال رام بن منتقل کیا گیا۔ انچارج میڈیکل سپرنٹنڈنٹ ضلع اسپتال رام بن، ڈاکٹر رفیع وانی نے بتایا کہ ماروگ بس حادثے میں زخمی ہونے والے 5 افراد کی حالت اور طبی ضرورت کو مدنظر رکھتے ہوئے انہیں مزید علاج کے لیے گورنمنٹ میڈیکل کالج و ہسپتال، جموں ریفر کیا گیا، جن میں ایک خاتون بھی شامل تھیں۔انہوں نے بتایا کہ جموں منتقل کیے جانے کے دوران مذکورہ خاتون نے دم توڑ دیا۔ متوفیہ کی شناخت جومنہ زوجہ رویندر ساکن مغربی بنگال کے طور پر ہوئی ہے۔ پولیس کے مطابق بس میں سوار بیشتر مسافر مغربی بنگال سے تعلق رکھتے تھے۔ حادثے کے بعد متعلقہ پولیس نے دونوں مقامات پر کارروائی کرتے ہوئے حادثات کی وجوہات کا جائزہ لیا اور زخمیوں کو بروقت طبی امداد کی فراہمی یقینی بنائی۔ڈپٹی کمشنر رام بن محمد الیاس خان نے قومی شاہراہ44 پر سفر کرنے والے مسافر بس ڈرائیوروں سے اپیل کی ہے کہ وہ پہاڑی شاہراہ پر احتیاط سے گاڑی چلائیں، رفتار پر قابو رکھیں اور موسمی و سڑک کے حالات کو مدنظر رکھتے ہوئے سفر کریں تاکہ ایسے حادثات سے بچا جا سکے۔ رام بن پولیس نے دونوں حادثات کے سلسلے میں مقدمات درج کر کے تحقیقات شروع کر دی ہیں۔ پولیس حکام نے بتایا کہ حادثات کی وجوہات کا تعین تحقیقات مکمل ہونے کے بعد کیا جائے گا۔
About the Author
