سٹی ایکسپریس نیوز
بارہمولہ، 28 نومبر،2025: چیف ایجوکیشن آفیسر، بارہمولہ نے حنفیہ ماڈل ہائر سیکنڈری اسکول، کریری کی انتظامیہ کے خلاف بدانتظامی کے الزامات کی تحقیقات کے لیے ایک تین رکنی انکوائری کمیٹی تشکیل دی ہے، جس میں والدین کی جانب سے ادارے پرزائد فیس کا مطالبہ کرنے اورڈ سچارج سرٹیفکیٹ کو روکنے کا الزام عائد کرنے کی شکایت کی گئی ہے۔
چیف ایجوکیشن آفیسر کی طرف سے جاری کردہ ایک سرکاری حکم نامے کے مطابق، محمد احمد اخون کی جانب سے سکول انتظامیہ کے چیئرمین کے خلاف درج کرائی گئی شکایت کی بنیاد پر انکوائری کا حکم دیا گیا ہے۔ شکایت کنندہ نے الزام لگایا ہے کہ اسکول نے فیس کے طور پر ایک غیر معقول رقم کا مطالبہ کیا اور اس کے وارڈ کا ڈسچارج سرٹیفکیٹ جاری کرنے سے انکار کردیا، جس کو حکم نامے میں مبینہ بدانتظامی قرار دیا گیا ہے۔
انکوائری کمیٹی کی سربراہی گورنمنٹ ہائیر سیکنڈری سکول کچوا مقام کے پرنسپل شرجیل عباس خان کریں گے۔ دیگر ممبران میں غلام قاسم، زونل ایجوکیشن آفیسر وگورہ اور محمد سلطان تانترے، ہیڈ ماسٹر، گورنمنٹ ہائی سکول شکرکواڑہ شامل ہیں۔
حکم نامے میں کہا گیا ہے کہ کمیٹی کو ہدایت کی گئی ہے کہ وہ شکایت کے تمام پہلوؤں کا مکمل جائزہ لے اور دو دن کے اندر مخصوص سفارشات کے ساتھ تفصیلی رپورٹ پیش کرے۔
چیف ایجوکیشن آفیسر نے کہا کہ اس معاملے سے قواعد کے مطابق سختی سے نمٹا جائے گا اور اگر کوئی خلاف ورزی ثابت ہوئی تو متعلقہ ضوابط کے تحت کارروائی کی جائے گی۔ ( کے این ٹی)
About the Author
