سٹی ایکسپریس نیوز
نئی دہلی، 10 ستمبر،2026: مرکزی حکومت نے بدھ کے روز اس اسکیم میں مزید دو سال کی توسیع کر دی ہے جس کے تحت ملازمین ‘لیو ٹریول کنسیشن’ پرجموں و کشمیر، لداخ، انڈمان و نکوبار جزائر اور شمال مشرقی خطے کا دورہ کر سکتے ہیں۔
وزارتِ عملہ نے ایک حکم نامے میں خبردار کیا ہے کہ لیو ٹریول کنسیشن سہولت کے کسی بھی قسم کے غلط استعمال پر مناسب کارروائی کی جائے گی۔
اہل مرکزی سرکاری ملازمین جب لیو ٹریول کنسیشن کی سہولت حاصل کرتے ہیں تو انہیں تنخواہ کے ساتھ چھٹی کے علاوہ آنے جانے کے ٹکٹوں کی رقم کی واپسی بھی ملتی ہے۔
حکم نامے میں کہا گیا ہے کہ سرکاری ملازمین کو شمال مشرقی خطے اور مرکز کے زیر انتظام علاقوں (جموں و کشمیر، لداخ اور انڈمان و نکوبار جزائر) کا ہوائی سفر کرنے کی اجازت دینے والی اسکیم میں مزید دو سال کی توسیع کی گئی ہے، جو 25 ستمبر 2026 سے 25 ستمبر 2028 تک نافذ رہے گی۔
اس میں کہا گیا ہے کہ تمام اہل سرکاری ملازمین چار سالہ مدت (بلاک پیریڈ) کے دوران اپنے آبائی شہر کے لیے مختص ایک لیو ٹریول کنسیشن کو تبدیل کر کے ان خطوں میں کسی بھی مقام کا دورہ کرنے کے لیے لیو ٹریول کنسیشن کی سہولت حاصل کر سکتے ہیں۔
حکم نامے کے مطابق، وہ سرکاری ملازمین جو عام طور پر ہوائی سفر کے اہل نہیں ہیں، انہیں بھی ان علاقوں کے لیے کسی بھی ایئر لائن کی اکانومی کلاس میں ہوائی سفر کرنے کی اجازت دی گئی ہے۔
مرکزی حکومت کی تمام وزارتوں کے سیکریٹریوں کو جاری کردہ حکم نامے میں کہا گیا، "نئے بھرتی ہونے والے ملازمین کو بھی چار سالہ مدت کے دوران اپنے لیے دستیاب تین ‘ہوم ٹاؤن لیو ٹریول کنسیشن’ میں سے ایک کو تبدیل کر کے شمال مشرقی خطے ، انڈمان و نکوبار اور جموں و کشمیر/لداخ کا دورہ کرنے کی اجازت ہے۔ اس کے علاوہ، انہیں چار سالہ مدت میں جموں و کشمیر یا لداخ کے مرکز کے زیر انتظام علاقوں کا دورہ کرنے کے لیے ‘ہوم ٹاؤن لیو ٹریول کنسیشن’ کی ایک اضافی تبدیلی کی بھی اجازت دی گئی ہے۔”
اس میں کہا گیا ہے کہ تمام وزارتوں اور محکموں کو ہدایت کی گئی ہے کہ وہ اپنے تمام ملازمین کو اس بات سے آگاہ کریں کہ لیو ٹریول کنسیشن کے کسی بھی غلط استعمال کا سنجیدگی سے نوٹس لیا جائے گا اور ملازمین قواعد کے تحت مناسب کارروائی کے ذمہ دار ہوں گے۔
وزارتِ عملہ نے کہا، "لیو ٹریول کنسیشن کے کسی بھی قسم کے غلط استعمال کی روک تھام کے لیے، وزارتوں/محکموں کو مشورہ دیا جاتا ہے کہ وہ حکام کی جانب سے جمع کرائے گئے کچھ ہوائی ٹکٹوں کی تصدیق متعلقہ ایئر لائنز سے کروائیں تاکہ ہوائی سفر کی اصل لاگت اور حکام کے جمع کردہ ٹکٹوں پر ظاہر کی گئی لاگت کا موازنہ کیا جا سکے۔”(ایجنسیاں)
About the Author
