سٹی ایکسپریس نیوز
نئی دہلی، 12 ستمبر،2026: حکام نے بتایا کہ سی بی آئی نے ایک کروڑ روپے کی رشوت کے معاملے میں سی جی ایس ٹی اور سینٹرل ایکسائز کمشنر کے دفتر کے ایک سپرنٹنڈنٹ اور ایک سی جی ایس ٹی کنسلٹنٹ کو گرفتار کیا ہے۔
ایجنسی نے یہ کارروائی مہاراشٹر کے ضلع رائے گڑھ کے علاقے ‘نیو پنویل’ میں واقع ایک نجی رئیل اسٹیٹ کمپنی کے پروجیکٹ ہیڈ کی شکایت پر بدھ کے روز ایف آئی آردرج کرنے کے بعد کی۔
یہ کمپنی نوی ممبئی کے نیو پنویل سیکٹر 17 میں دو عمارتوں کی تعمیرِ نوکا کام کر رہی تھی، جن میں سی جی ایس ٹی اور سینٹرل ایکسائز، رائے گڑھ کمشنریٹ کی ملکیت والے 24 فلیٹس بھی شامل تھے۔
سی بی آئی کے ترجمان نے ایک بیان میں کہا کہ شکایت میں الزام لگایا گیا ہے کہ سپرنٹنڈنٹ پنکج کمار نے ‘نو آبجیکشن سرٹیفکیٹ’ جاری کرنے اور تعمیرِ نو کے لیے فلیٹس حوالے کرنے کے عوض ایک کروڑ روپے کا مطالبہ کیا۔
ترجمان نے کہا، "شکایت کی تصدیق کے دوران، ملزم افسر نے 10 ستمبر کو 10 لاکھ روپے نقد کا مطالبہ کیا، جبکہ مزید 20 لاکھ روپے اس فلیٹ کی پیشگی ادائیگی کے طور پر مانگے جو خود ملزم سرکاری ملازم نے خریدا تھا، اور 70 لاکھ روپے بعد کے مرحلے میں ڈی جی ایچ آر ڈی سی جی ایس ٹی، نئی دہلی کے دیگر افسران کے لیے طلب کیے۔”
سی بی آئی نے بتایا کہ اس نے جمعرات کو ایک جال بچھایا جب ملزم سپرنٹنڈنٹ نے شکایت کنندہ کو ہدایت کی کہ وہ 10 لاکھ روپے کی رشوت وہاں موجود سی جی ایس ٹی کنسلٹنٹ، پرساد کمار سوامی کے حوالے کر دے۔
ایجنسی نے جمعرات کو دونوں ملزمان کو گرفتار کیا اور جمعہ کو انہیں متعلقہ عدالت میں پیش کیا، جس نے انہیں دو روزہ پولیس تحویل میں بھیج دیا۔ (ایجنسیاں)
About the Author
