سٹی ایکسپریس نیوز
سری نگر، 10 ستمبر،2026: این ایچ پی سی کےاوڑی-1 اسٹیج-2 پروجیکٹ کی سائٹ پر پیش آنے والے ایک حادثے میں شدید زخمی ہونے والا مزدورسکمزصورہ میں زخموں کی تاب نہ لاتے ہوئے چل بسا۔
متوفی کی شناخت جاوید احمد بٹلا عرف جاوید خان، ساکن پرنگل، بونیار کے طور پر ہوئی ہے۔ وہ سرنگ (ٹنل) کی تعمیراتی جگہ پر ‘میکس انفرا کمپنی’ کے ساتھ کام کر رہا تھا جب منگل کی رات وہ شدید زخمی ہو گیا۔ اسے پہلے پی ایچ سی بونیار منتقل کیا گیا اور بعد ازاں جی ایم سی بارہمولہ اور پھرسکمزصورہ ریفر کیا گیا، جہاں بدھ کے روز اس کا انتقال ہو گیا۔
مقامی لوگوں کے مطابق، یہ ہلاکت کمپنی کی غفلت کے باعث ہوئی کیونکہ احتیاطی تدابیر اختیار نہیں کی گئی تھیں اور جاوید سرنگ کے اندر ایک ڈھیلے پتھر کی زد میں آ گیا۔
مقامی لوگوں نے اس واقعے کی تحقیقات کا مطالبہ کیا ہے۔ بتایا جاتا ہے کہ اوڑی میں نئے پاور پروجیکٹ پر کام کے دوران یہ پہلی ہلاکت ہے۔
دریں اثنا، پولیس نے معاملے کا نوٹس لے لیا ہے اور مزید کارروائی شروع کر دی گئی ہے۔
About the Author
