سٹی ایکسپریس نیوز
نئی دہلی، 3 اگست،2026: کانگریس صدر ملکارجن کھڑگے نے پیر کو مطالبہ کیا کہ وزیر داخلہ امت شاہ پارلیمنٹ میں آکر احتجاج کرنے والے طلبہ پر لاٹھی چارج اور پیلٹ گن کے استعمال کے معاملے پر وضاحت دیں۔
راجیہ سبھا میں اپوزیشن لیڈر نے یہ بھی مطالبہ کیا کہ وزیر اعظم نریندر مودی اس بات کا جواب دیں کہ رام مندر کے لیے دیے گئے چندے کی چوری کیسے ہوئی۔
کھڑگے نے پارلیمنٹ ہاؤس کمپلیکس میں واقع اپنے چیمبر میں ‘انڈیا’ اتحاد کی جماعتوں کے فلور لیڈرز کے اجلاس کے بعد ‘ایکس’ (X) پر کہا، "مودی حکومت کو ‘انڈیا’ (اتحاد) کو جواب دینا ہوگا۔ وزیر داخلہ کو پارلیمنٹ میں آکر طلبہ پر لاٹھی چارج اور پیلٹ گن کے استعمال پر وضاحت دینی چاہیے۔
"وزیر اعظم کو جواب دینا چاہیے کہ شری رام مندر کے لیے دیے گئے چندے (چندہ-چڑھاوہ) کی چوری کیسے ہوئی، حالانکہ یہ ٹرسٹ وزیر اعظم کی نگرانی میں تھا”۔
اپوزیشن 20 جولائی کو احتجاج کرنے والے طلبہ کے خلاف پولیس کی کارروائی (جس میں پیلٹ گن کا استعمال بھی شامل تھا) پر وزیر داخلہ سے بیان کا مطالبہ کر رہی ہے اور اس معاملے پر ان کے استعفے کا بھی مطالبہ کیا ہے۔
اس اجلاس میں کھڑگے کے علاوہ لوک سبھا میں اپوزیشن لیڈر راہل گاندھی، کانگریس کے جنرل سکریٹری جے رام رمیش اور کے سی وینوگوپال، ایس پی کے دھرمیندر یادو، ٹی ایم سی کی مہوا موئترا اور ساگاریکا گھوش، این سی پی (ایس پی) کی سپریہ سولے، شیو سینا (یو بی ٹی) کے سنجے راوت اور اروند ساونت، جے ایم ایم کی مہوا ماجی، سی پی آئی (ایم) کے جان برٹاس اور سی پی آئی کے پی سنتوش کمار، آر ایس پی کے این کے پریم چندرن سمیت دیگر رہنماؤں نے شرکت کی۔
‘انڈیا’ اتحاد نے چندے کی مبینہ چوری اور نییٹ کا پرچہ لیک ہونے پر ہونے والے احتجاج کے دوران طلبہ کے خلاف "وحشیانہ طاقت” کے استعمال کے معاملات پر حکومت کو گھیرنے کا عزم کیا ہے۔(ایجنسیاں)
About the Author
