سٹی ایکسپریس نیوز
سری نگر، 18 نومبر،2025: جموں کشمیر کے وزیر اعلی عمر عبداللہ نے منگل کو کہا کہ لوگ ان حالات کے بارے میں واضح جواب کے مستحق ہیں جن کی وجہ سے نوگام پولیس اسٹیشن کے اندر حادثاتی دھماکہ ہوا۔
اُجالا اسپتال میں زخمیوں کی عیادت کے بعد صحافیوں سے بات کرتے ہوئے انہوں نے سوال کیا کہ اتنی بڑی مقدار میں دھماکہ خیز مواد پولیس کے احاطے میں کیسے پہنچا اور واقعہ کیوں اور کیسے ہونے دیا گیا۔
انہوں نے کہا کہ دھماکے میں ایسے افراد کی جانیں گئیں جن کا سرکاری کاموں سے کوئی تعلق نہیں تھا۔ انہوں نے کہا کہ ہلاک ہونے والوں میں ایک درزی اور ایک فوٹوگرافر بھی شامل ہے۔ یہ کیسے اور کیوں ہوا اس کی وضاحت ہونی چاہیے۔
عمر عبداللہ نے اُجالا اسپتال کے طبی عملے کی ان کے فوری ردعمل کی تعریف کی۔ “یہاں کے عملے نے ہمت کا مظاہرہ کیا اور پوری لگن کے ساتھ زخمیوں کا علاج کیا۔ میں واقعی ان کا شکر گزار ہوں،” انہوں نے کہا۔
انہوں نے اس بات کا اعادہ کیا کہ عوام پولیس اسٹیشن کے اندر حساس مواد کو ذخیرہ کرنے اور ہینڈلنگ کے حوالے سے شفافیت اور مکمل وضاحت کی توقع رکھتے ہیں۔ ( کے این ٹی)
About the Author
