دہشت گردی سے پاک جموں وکشمیر دُور نہیں
کہامستقبل میں دہشت گردی کی کسی بھی کارروائی کو بھارت کےخلاف جنگ تصور کیا جائے گا
نیوز سروس
سرینگر: ۹۱،جولائی : جموں و کشمیر کے لیفٹنٹ گورنر منوج سنہا نے اس بات کا اعادہ کیاہے کہ خون اور پانی ساتھ نہیں چل سکتے اور ساتھ ہی کہاہے کہ پاکستان کےساتھ سندھ طاس معاہدہ میں رُکنے سے آنے والے وقت میں اسکی معیشت متاثر ہوگی۔جمعہ کو سنت کمار شرما کی لکھی ہوئی ایک کتاب ’انڈس واٹر ٹریٹی ،حقائق کی آئینہ دار‘کی ریلیز کے موقع پر، لیفٹنٹ گورنر منوج سنہا نے پہلگام حملے میں مارے گئے لوگوں کو بھی خراج عقیدت پیش کیا۔ لیفٹنٹ گورنر منوج سنہا نے کہاہے کہ میں پہلگام حملے میں مارے جانے والوں کو خراج عقیدت پیش کرتا ہوں، پاکستان کی سرپرستی میں دہشت گردوں نے ہمارے شہریوں کو قتل کیا۔انہوں نے کہاکہ آپریشن سندور شروع ہوا، اور کیا ہوا، سب کو معلوم ہے، اس سے پہلے وزیراعظم نریندر مودی نے سندھ طاس معاہدہ معطل کیا، جو ایک تاریخی فیصلہ تھا۔ جیسا کہ آپ جانتے ہیں کہ اس معاہدے کے بعد بھارت کو تین جنگیں بھی لڑنی پڑیں، اور بھارت کشمیر میں دہشت گردی کو روکنے میں ناکام رہا۔ وزیراعظم نے کہا کہ پانی اور خون ساتھ نہیں چل سکتے۔منوج سنہا نے کہاکہ انڈس واٹر ٹریٹی کو روکنے کا یہ اقدام ایسا ہے کہ آنے والے وقت میں پاکستان کو اس کا خمیازہ بھگتنا پڑے گا، پاکستان اپنی16 ملین ہیکٹر زمین کی کاشت کےلئے بھارت کے پانی پر منحصر ہے، 237 ملین آبادی اس معاہدے پر منحصر ہے، آنے والے سالوں میں اس معاہدے کا اثر پاکستان کی معیشت پر پڑے گا۔ وزیراعظم نریندر مودی نے کہا کہ بھارتی پانی اب صرف بھارت کی مدد کرے گا۔ جموں و کشمیر کے لیفٹنٹ گورنر نے یقین دلایا کہ ریاست دہشت گردی کےخلاف سخت کارروائی کرنے کےلئے پرعزم ہے۔ منوج سنہا نے کہاکہ مستقبل میں دہشت گردی کی کسی بھی کارروائی کو بھارت کےخلاف جنگ تصور کیا جائےگا۔ لیفٹنٹ گورنر منوج سنہا نے کہاکہ ہم دہشت گردی سے پاک جموں و کشمیر کے حصول کے بہت قریب ہیں۔ عام کشمیری اس دہشت گردی کےخلاف ہے۔ پاکستان نے کئی بے گناہ کشمیریوں کو قتل کیا ہے۔ دہشت گردی کے مقدمات میں ایف آئی آر درج کی جائے گی اور دہشت گردی سے متاثرہ افراد کو انصاف فراہم کیا جائے گا۔ گزشتہ روز ٹی آرایف کو امریکہ نے دہشت گرد تنظیم قرار دیا تھا ہم دہشت گردوں کے خلاف سخت کارروائی کریں گے۔اس سے پہلے دن میں، لیفٹنٹ گورنر منوج سنہا نے مہارشی دیانند سرسوتی کے200ویں یوم پیدائش اور آریہ سماج کے قیام کی150ویں سالگرہ کی یاد میں جموں میں صوبائی آریہ مہاسمیلن سے خطاب کیا۔ (ایجنسیاں)
About the Author
