چور کے ہاتھوں نوجوان کاگھرمیں چاقو مار کر قتل
ملزم کو افراد خانہ نے دبوچ لیا،علاقے میں احتجاج ،کیس درج
نیوز ایجنسی
سرینگر: ۸۱،جولائی :جنوبی کشمیرمیں جمعہ کی صبح ڈاکہ زنی کے ایک سنسنی خیز واقعے میں تیز ہتھیار سے لیس ایک چورنے اگلے ماہ شادی کے بندھن میں بندھنے والے28سالہ نوجوان کو گھر میں گھس کر چاقو کے وار کر کے قتل کر دیا۔جے کے این ایس کے مطابق ایک 28 سالہ نوجوان کو جمعہ کے روز قاضی گنڈ کے سنگران علاقے میں ایک چور نے مبینہ طور پر اس کے گھر میں گھس کر چاقو کے وار کر کے قتل کر دیا۔مقتول نوجوان کے بھائی نے میڈیا کو بتایاکہ اُن کے بھائی 28سالہ زاہد احمد بانڈے ولد محمد یاسین بانڈے کو جمعہ کی صبح قاضی گنڈ کے کش گنڈ سنگران میں اس کے گھر کے اندر ڈکیتی کی کوشش میں مزاحمت کرتے ہوئے چاقو کے وار کر کے قتل کر دیا گیا۔انہوںنے کہاکہ زاہد احمد بانڈے کو چور کے ہتھیار سے شدید چوٹیں آئیں اور انہیں قریبی ہسپتال لے جایا گیا لیکن پہنچنے پر اسے مردہ قرار دے دیا گیا ۔مقتول نوجوان کے بھائی نے روتے ہوئے کہاکہ میرے بھائی کی شادی اگلے ماہ ہونے والی تھی اور ہم تیاریوں میں مصروف تھے ۔اُس نے کہاکہ ہم نے شادی کیلئے سامان بھی لایاہے ،جوگھرمیں پڑا ہے ،لیکن میرا بھائی ہم سب کو چھوڑ کرچلاگیا۔سرکاری ذرائع نے بتایا کہ ایک ڈاکو جو سیکورٹی فورسز کا رکن ظاہر کرتا ہے، تلاشی لینے کے بہانے سانگراں کے کش گنڈ کے رہائشی محمد یاسین بانڈے کے گھر میں گھس گیا۔کچھ گڑبڑ محسوس کرتے ہوئے گھر کے مالک کے بیٹے زاہد احمد بانڈے نے گھسنے والے کا مقابلہ کیا اور اسے پکڑنے کی کوشش کی جس کے نتیجے میں ہاتھا پائی ہوئی۔ لڑائی کے دوران زاہد کو ڈاکو نے تیز دھار ہتھیار سے حملہ کر کے شدید زخمی کر دیا۔اسے فوری طور پر ایمرجنسی ہسپتال قاضی گنڈ لے جایا گیا جہاں وہ زخموں کی تاب نہ لاتے ہوئے چل بسا۔ خاندان کے دیگر افراد نے ڈاکو کو پکڑ کر قاضی گنڈ پولیس کے حوالے کر دیا۔اس کے قبضے سے ایک کھلونا پستول اور تیز دھار چاقو برآمد ہوا۔جھڑپ کے دوران زخمی ہونے والے ڈاکو کو علاج کے لیے جی ایم سی اننت ناگ منتقل کیا گیا۔ایک پولیس افسر نے بتایا کہ واقعے کی مکمل تحقیقات شروع کر دی گئی ہیں۔اہلکار نے بتایا کہ مقدمہ درج کر لیا گیا ہے اور مزید تفتیش جاری ہے۔اس دوران گاﺅںکے لوگ سڑکوں پر نکل آئے اور انہوںنے نوجوان کے سنسنی خیز قتل کیخلاف پُرامن احتجاج کرتے ہوئے قاتل ڈاکو کو سخت سے سخت سزا دینے کا مطالبہ کیا۔بعدازاں مقتول نوجوان زاہد احمد بانڈے کی نماز جنازہ میں لوگوںکی ایک بڑی تعدادنے شرکت کی جبکہ اس دوران رقعت آمیزمناظر دیکھے گئے۔مقتول کی میت کو اشکبار آنکھوں کے سامنے سپردلحدکیاگیا۔
About the Author
