وزیر موصوفہ نصف شب کے بعد وارڈوں میں
طبی خدمات کا معیار ، ڈاکٹروں اورپیرا میڈیکل عملے کی دستیابی کا جائزہ
انفو
سری نگر/۴۲،جولائی:وزیر برائے صحت و طبی تعلیم، سماجی بہبود و تعلیم، سکینہ ایتو نے عوامی خدمت اور صحت شعبے میں جوابدہی کا مظاہرہ کرتے ہوئے جے وی سی ہسپتال بمنہ کا دیررات کو اچانک معائینہ کیا۔ اس دوران اُنہوں نے رات کے اَوقات میں فراہم کی جانے والی طبی خدمات کے معیار اور ڈاکٹروں و پیرا میڈیکل سٹاف کی دستیابی کا تفصیلی جائزہ لیا۔معائینے کے دوران وزیر موصوفہ نصف شب کے بعد وارڈوں میں گئیں اور ڈاکٹروں ، نرسنگ سٹاف ، طبی سامان اور ایمرجنسی رسپانس سسٹم کی دستیابی کا ذاتی طور پر جائزہ لیا۔ اُنہوں نے ہسپتال کے بنیادی ڈھانچے، ایمرجنسی خدمات، زچہ و بچہ نگہداشت ، صفائی ستھرائی اور مریضوںکے وارڈوں کی حالت کابھی تفصیلی جائزہ لیا۔اُنہوں نے مریضوں اور اُن کے تیمارداروں سے بھی بات چیت کی اور ان کی شکایات، تاثرات اور تجاویز کو بغور سنا۔وزیرصحت نے ڈاکٹروں اور طبی عملے کے روسٹر رجسٹر کو بھی چیک کیااور واضح ہدایات جاری کیں کہ تمام عملہ طے شدہ روسٹر کے مطابق موجود رہے۔اُنہوں نے ڈاکٹروں کے ساتھ بات چیت کرتے ہوئے کہا کہ سرکاری صحت اداروں میں چوبیس گھنٹے جوابدہی لازمی ہے۔ اُنہوں نے کہا، ”صحت سہولیات نو سے پانچ تک کی سروس نہیں ہوتیں، ہسپتالوں کو ہر وقت مکمل طور پر فعال اور جوابدہ ہونا چاہیے۔“وزیر موصوفہ نے مزید کہا کہ رات کے اَوقات میں بھی مریضوں کو معیاری اور بروقت علاج میسر آنا چاہیے کیوں کہ یہی وہ وقت ہوتا ہے جب لوگ سب سے زیادہ کمزور اور مدد کے محتاج ہوتے ہیں۔دورے کے دوران لوگوں نے وزیر صحت کے اس غیر متوقع دیر رات کے معائینے اور صحت کے نظام کو بہتر بنانے کی کوششوں کو سراہا۔
About the Author
